БИШКЕК, 22-янв. — Sputnik. Абу-Даби шаарында футбол боюнча Азия кубогунда Кыргызстандын курама командасы каршылашы Бириккен Араб Эмирлигинин командасына 3:2 эсебинде жеңилди.
Оюн Араб Эмирлигиндеги Zayed Sports City Stadium стадионунда өттү.
Мындан бир нече күн мурда кыргыз футболчулары филиппиндиктерди 3:1 эсеби менен жеңип, тайпадан татыктуу чыгып, 1/8 финалга жолдомо алган.
Эсепти 1-таймда атаандаштар ачса, аларга удаа эле оюндун 26-мүнөтүндө 10-номердеги Мирлан Мурзаев топту киргизип, эсепти 1:1 кылды. Ошентип беттештин биринчи бөлүгүндө тең чыгышты.
Оюнда кыргызстандык спортчулар бир топ учурларда чеберчилигин көрсөтүп, атаандаштардын шаштысын кетирген учурлар болду.
Команданын башкы машыктыруучусу Александр Крестинин Кыргызстан да чейрек финалга өтчү командалардын арасында болушу керектигин, бул үчүн ал бардык күч-аракетин жумшап жатканын белгилеген.
Букмекерлер мындан бир нече күн мурда Кыргызстан курама командасынын Бириккен Араб Эмирлигинин футболчуларын утуп алуу мүмкүнчүлүгү төмөндүгүн эскертишкен.
КР командасы тайпалык беттеште Кытай жана Түштүк Корея командаларынан утулганы менен филиппиндиктерди утканын билебиз. Плей-оффко улуттук команда тайпадагы үчүнчү орундан чыккан.
